Azay Quliyev Şuranın dəstəyi ilə Ankarada “Qarabağ problemi: Hardan haraya adlı konfransda çıxış edib

Bu gün Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının xarici QHT-lərin layihələrinin maliyələşdirilməsi çərçivəsində dəstək verdiyi “Avrasiya Sivil Toplum əməkdaşlıq Dərnəyi” və “Avrasiya İqtisadi əməkdaşlıq Dərnəyi”nin birgə təşkilatçılığı ilə Türkiyənin paytaxtı Ankara şəhərində “Qarabağ problemi: Hardan haraya” adlı konfrans keçirilir.Toplantıda Qarabağ, 20 yanvar və Qafqaz İslam Ordusu şəhidlərinin ruhu sayğı duruşu ilə yad edilib.Konfransda çıxış edən Şura sədri, millət vəkili Azay Quliyev təmsil etdiyi qurumun Azərbaycanın milli maraqlarının dünyada tanıdılmasında vətəndaş cəmiyyəti ilə əməkdaşlığın prioritet təşkil etdiyini bildirib.Azay Quliyev Ermənistan-Azərbaycan, Dağlıq Qarabağ münaqişəsinin başlanmasından artıq 25 ildən artıq zaman ötməsinə və bu mövzuda müxtəlif dillərdə minlərlə kitab və məqalənin nəşr olunmasına, internet resurslarının yaradılmasına baxmayaraq hələ də bu problemin mənşəyinə dair obyektiv informasiyaların dünyada yayılmasına ehtiyac duyulduğunu qeyd edib.Şura sədri Ermənistanın hər nə qədər dünyada bu münaqişədə tərəf olmadığı, Qarabağ probleminin Azərbaycanın öz erməni vətəndaşları ilə bağlı olması haqqında saxta rəy yaratmaq istəyinə rəğmən ortada inkar olunmaz siyasi sənədlərin olduğunu söyləyib. Azay Quliyev 1989-cu ilin dekabrın 1-də Ermənistan parlamentinin Dağlıq Qarabağ Muxtar Vilayətinin Ermənistana birləşdirilməsi ilə bağlı qərarının rəsmi İrəvanın Azərbaycan torpaqlarına qarşı yeritdiyi işğalçılıq siyasətində önəmli bir yer tutduğunu bildirib. O, hazırda Qarabağ münaqişəsinin üç mümkün həlli variantı - sülh və danışıqlar, beynəlxalq təzyiq və sanksiya və hərbi yol olduğunu vurğulayıb.Azay Quliyev Ermənistanın işğalçılıq siyasətini ifşa etmək və torpaqlarımızın azad edilməsi ilə bağlı yol xəritəsi hazırlamaq, Xocalı soyqırımını dünya ölkələrinin parlamentlərində tanıtmaq,  qondarma erməni soyqırımına dair həqiqətləri yaymaq və ermənilərin 2015-ci il planının qarşısını almaq üçün Türkiyə və Azərbaycanın vahid fəaliyyət planının olmasının vacibliyini bildirib.Konfransda Türkiyənin Azərbaycan Dostluq Qrupunun rəhbəri Necdət Ünüvar, Girəsun Universtetinin rektoru Aygün Attar, millət vəkili Rəşad Doğru, Azərbaycanın Türkiyədəki fövqaladə və səlahiyyətli səfiri Faiq Bağırov, “Avrasiya Sivil Toplum əməkdaşlıq Dərnəyi”nin sədri, millət vəkili İsmail Safi, Türkiyənin Avropa Birliyi ilə əlaqələr Nazirinin müavini laəddin Böyükqaya və digərləri çıxış edərək iki qardaş dövlətin bütün sahələrdə imkanlarını birləşdirərək Qarabağın işğaldan azad edilməsi ilə bağlı vahid siyasət həyata keçirməli  olduğunu vurğulayıblar.



20.01.2014 | 13:59